**"رحلة حول العالم من بيتك"**
*تاج محل:
تاج محل هو ضريح جنائزي هائل شُيّد من الرخام الأبيض بين عامي 1631
و1648 في أغرا بناءً على أوامر الإمبراطور المغولي شاه جهان بهدف تخليد ذكرى
زوجته المفضّلة. ويشكّل تاج محل الذي يُعتبر أفضل جوهرة في الفن الإسلامي في الهند
إحدى أبرز تُحف التراث البشري التي هي محطّ إعجاب العالم بأسره.
الهند – أرض الألوان والعجائب
# الثقافة والتقاليد:
الهند مش بس بلد، دي قارة من التقاليد!
- بتحترم جدًا الكبار في السن، والاحترام بيبان في طريقة الكلام والانحناء الخفيف.
- العيلة هناك جزء أساسي من الحياة اليومية، وغالبًا بيعيشوا كذا جيل في نفس البيت.
- فيه ديانات كتير في الهند: الهندوسية، الإسلام، السيخية، والمسيحية، وكل ديانة ليها
تقاليدها ومناسباتها.
# 🎉 المهرجانات: كرنفالات ما تتفوتش:
- **هولي – مهرجان الألوان**: الناس بترمي ألوان بودرة على بعض في الشوارع،
فرح وضحك وزحمة حلوة.
- **ديوالي – عيد الأنوار**: البيوت كلها بتتزين بالشموع والزينة، والألعاب النارية
بتنور السماء.
# 🍛 الأكل الهندي: نار من البهارات!
- **البرياني**: رز متبّل بتوابل قوية، ومعاه فراخ أو لحمة.
- **الماسالا**: صوص حار معمول من الطماطم والزنجبيل والتوابل.
- **الشاباتي والنان**: خبز طري بيتاكل مع الأطباق الرئيسية.
- والمفاجأة: فيه أكلات نباتية تحففففة، والهنود شطار جدًا في تنويع الخضار.
# 👗 الملابس: ألوان بتتكلم:
*- الستات بيلبسوا "الساري" أو "السلوار كاميص" – ألوان وأنواع أقمشة خيالية.
*- الرجالة بيلبسوا "الكورتا" في المناسبات، وهو جلابية طويلة أنيقة.
# روحانية وهدوء:
*- الهند هي مهد اليوجا، والتأمل جزء من حياتهم اليومية.
*- معابدها فيها طاقة غريبة من الراحة والسلام، حتى وسط الزحمة!
مرحبًا بيكم في حلقة جديدة من *"رحلة حول العالم من بيتك"*
النهاردة، هنسافر سوا… مش بالطيارة، لأ… بس بخيالنا وروحنا… إلى بلد مدهشة، بلد
كل شارع فيها له قصة…
بلد السحر، والبهارات، والألوان...
تفتكروا أول حاجة بتخطر في بالكوا لما تسمعوا اسم "الهند"؟
يمكن البرياني؟
يمكن الساري الملوّن؟
بس صدقوني، الهند أكبر من كل ده بكتير…
في مدينة اسمها "فاراناسي"، الناس بتروح هناك مش بس علشان تعيش… لأ، علشان
تموت!
آه، بتعتبر المدينة بوابة للسلام الأبدي، وفيها نهر الجانج، النهر المقدس اللي الناس بتنزل
تستحمى فيه علشان تطهّر أرواحها.
وعلى بعد آلاف الكيلومترات، في الجنوب، هتلاقي خُضرة كأنك في الجنة…
في كيرالا، الناس عايشة وسط المياه والأشجار، بيركبوا قوارب بدل العربيات، وبيسمعوا
صوت الطبيعة بدل الزحمة.
طب وعايزين أكل؟
الهند فيها أكل مش بس حار… ده مولّع! 🔥
بس طعمه؟ لا يُقاوم!
برياني، ماسالا، شاباتي…
وكل وجبة فيها حكاية… فيها بهارات بتتكلم!
أما عن اللبس… فـ "الساري" مش مجرد قماش، ده لوحة فنية بتمشي على الأرض.
الستات هناك بيلبسوا ألوان تخليك تبتسمي من غير سبب.
والرجالة؟ في المناسبات، الكورتا بتديهم هيبة مش عادية.
الهند بلد فيها مليون وجه…
فيها التناقضات، وفيها الانسجام.
فيها القديم اللي عمره آلاف السنين، وفيها الجديد اللي سبقنا بخطوات.
تخيّلي إنك ماشية في زقاق ضيق، والريحة اللي جاية من كشك صغير على ناصية
الشارع… بهارات متقلّبة في الزيت، وموسيقى خفيفة جاية من بعيد…
ست عجوزة لابسة ساري أحمر ومنقوش بالدهبي، قاعدة على الأرض، بتبيع أساور
ملونة، وتضحكلك كأنها تعرفك من زمان.
والراجل اللي جنبها بيقلي "سموسا" سخنة، يحطهالك في ورقة جرايد قديمة…
تغريكي تاكليها حتى لو مش جعانة.
الهند مش بس بلد… دي *مشاعر*.
ممكن في لحظة تضحكي، ولحظة تدمّعي، ولحظة تقفي ساكتة قدام مشهد مش قادرة
توصفيه…
فتاة صغيرة ماشية حافية، ماسكة في إيد أمها، لكن وشها مليان براءة وفرحة...
وفي الخلفية، معبد ضخم، الناس بتدخل وتخرج، تحط ورد، تشعل شمعة… وتسكت.
كأن المكان بيحكي من غير صوت.
الهند بلد بيعلّمك الهدوء وسط الضوضاء…
اليوجا مش بس رياضة، دي طريقة حياة.
ناس بتصحى من الفجر تتأمل، تتنفس، وتسكت…
تسكت علشان تسمع صوت جواها.
وفي وسط كل دا… فيه شباب طموحين، بيشتغلوا في تكنولوجيا، في شركات عالمية،
بيخترعوا وبيصدروا.
الهند مش بس تراث، الهند كمان مستقبل.
في نهاية الرحلة… هتسألي نفسك:
إزاي بلد واحدة فيها كل التناقضات دي؟
الإجابة بسيطة: الهند… مش لازم تفهميها، بس لازم تعيشيها، ولو حتى بخيالك.
السياحة في الهند تتخذ من العظمة والتميز زيًا لها من خلال الموقع الرائع، وتحافظ
البلاد على ممتلكاتها التاريخية والآثرية بصورة كبيرة،إذ أن الشعب الهندي هو
صاحب أكبر تنوع لغوي وعرقي وكذلك ديني على مستوى العالم. إنها تنوعات
شديدة التباين وكفيلة بهدم أي دولة.
بقلم /الكاتبة سيدة حسن
إرسال تعليق