يا فرحة ما تمت حب وزواج عرفي
القصة اليوم عن شابة بتحكي انها واحدة من سبع اخوات هي أصغرهم تقول أنا الحمد لله
علاقتي باصدقائي حلوة جدا لان وقتي كله قضيته معاهم وعندي طموح عالي .
تفوقت بالجامعة وتخرجت منها وتم تعيني في شركة قطاع خاص وكنت ملتزمة بعملي جدا
وقدرت في خلال فترة قصيرة اني أتقدم في شغلي واترقي ،ومع الوقت بقي معانا جروب
بنتواصل عليه احنا والزملاء فتواصلت مع شاب بالخاص وطلب مني رقمي الخاص
وطلب مني رقم والدي علشان ييجي يتقدم لي للزواج ولكن مع الاسف الأهل رفضوا بشدة
لأنه لاينتمي الي العائلة واحنا الجواز من نفس العيلة واتعلقت به جدا وحبيته وفضلنا سنة
نتقابل من ورا الأهل ولكن مع الحفاظ علي سمعتي أنا وأهلي وبقيت كل يوم أقوله حاول
تشوف طريقة نتجوز بها حتي ولو في السر وكان هو لطيف وذوق ومحترم جدا معايا
وفضلنا مع بعض لحد ما تتفقنا علي الجواز العرفي وجبنا ورقة واتنين شهود ووقعوا
ووقعنا معاهم وعيشنا عيشة الأزواج ومرت 8 شهور جميلة وفجأة حسيت بتعب شوية
كشفت طلعت حامل ومع الأسف لما روحت المستشفي ما كنتش لوحدي كان معايا
صديقاتي بالعمل واتفاجئوا بفكرة اني حامل وسألوني امتي اتجوزتي قلت من فترة قريبة
وباركوا لي الجواز وكانوا فرحانين لي جدا .
فاتصلت بجوزي وعرفته اني حامل وكنت فرحانة جدا اني حامل منه كنت مفكرة ان الخبر
هيفرحه وهيبقي وسيلة للدخول علي أهلي ونتجوز رسمي والكل يبقي عارف وشاهد علينا
وروحت قابلته فقالي لازم الطفل ينزل فرفضت وابتدي يهددني وزعلني جدا ونقل نفسه
للفرع التاني للشركة اللي ساكن فيها أهله اترجيته وقلت له أوعي تسيبني لوحدي وانا
خلاص هانزل البيبي ونعيش مع بعض وتيجي تتقدم تاني لأهلي ونعيش حياة طبيعية من
غير خوف ولا قلق فضحك ضحكة استهزاء ما كنتش متوقعاها منه أبدا لحد الآن وصلت
لبيتنا ودموعي بتنزل من عيني من غير ما اتحكم فيها وكنت من جوايا أتمني الموت
بسبب اللي حصل لي منه واللي سمعته منه بعد ما حبيته وضحيت بنفسي علشانه ومع
الأسف راح في وسط أهله واتجوز وسابني لوحدي في كرب عظيم وابتدت بطني تكبر
وبان الحمل عليا ابتديت ألبس لبس واسع وأخطط مع صديقتي ازاي أولد الطفل
فاضطريت أكدب علي أهلي وأبلغهم اني انتقلت لفرع الشركة في مكان تاني وهاروح أنا
وصديقتي نستلم الشغل في المكان الجديد وافقوا أهلي وروحت معاها للبلدة اللي بتعيش
فيها واتفاجأت ان بيت صديقتي وأهله بيجاور بيت الشخص اللي وعدني بالحب والحياة
والجواز واتخلي عني وقعدت اترجاها تساعدني وفعلا بدأنا في تحضير بعض الخطط
اللي تليق بمقامه واللي تخليني أخد حقي منه بعد ما اتسبب في كسرتي.
(انتظروني في الجزء الثاني من القصة )
بقلم /الكاتبة سيدة حسن
إرسال تعليق