خيانة زوج في شكل ضحية
انا بنت جميلة ومحبوبة عشت في بيت فيه دلع ورفاهية وامي كانت مدرسة وابويا
بيشتغل في قطاع خاص وانا اكبر واحدة في اخواتي ومش بحب شغل البيت اغلب الوقت
بقرأ وبذاكر ،اتخرجت من الجامعة قسم انجليزي كانت النتيجة حلوة جدآ وجبت تقدير
امتياز مع مرتبة الشرف وكان بيجيلي عرسان كتير وانا كنت برفض عشان انا عايزة
واحد غني ومقتدر ماديآ ووسيم ،وفي يوم من الايام صادف ان مدرسة صديقة لأمي
جات عشان تخطبني لأبنها اللي عمره 32 سنة والحقيقة مكنتش اعرف ان صديقة امي
عندها شاب في السن ده وهي ست محترمة جدآ وكتومة ومحدش يعرف عنها حاجة
تخص حياتها غير انها اتجوزت في سن صغير واتطلقت وعاش ابنها مع ابوه وكمل
تعليمه ووظفه ولما شوفته اعجبت به ووقت الخطوبة كان جايب هدايا كتير
واكسسوارات وساعات وعزمت الكل وقت كتب الكتاب وكانت ام العريس في غاية
الجمال والاناقة وكانت فرحانة جدآ بأبنها رقصت معانا وقعدت تحضن ابنها وتبكي
وتقولي انتي دعوة ربنا ليا المستجابة وان ربنا عوضني بأبنة وزوجة ابن في نفس
الوقت المهم عدت الايام واتجوزت وجوزي كان بيحبني جدآ وكان دايمآ بيقولي انك
هتعوضني عن حنان امي ودايمآ يحكيلي ويشتكي من امه انها رمته يتربى مع مرات
ابوه اللي كانت بتعذبه وتعامله وحش كانت نادرآ تسأل عنه وده عكس كلام امه لما كانت
تحكي والمهم بعد ما خلصنا شهر العسل رجعنا وقعدنا في نفس البيت مع امه كانت دايمآ
تطلع الاكل وتهتم بينا وهو دايمآ مستمر في الشكوى منها لدرجة اني بدأت اتغير منها
ومعاملتي معاها كمان اتغيرت بسبب كلام جوزي عنها وفي الفترة دي كنت حامل
ولدت ابني زي القمر وكمان ربنا رزقني بشغل وكنت برجع الساعة 4 ومع الوقت بقيت
برجع 9 بالليل وكنت بسيب الولد مع حماتي لحد عمره ما بقى 3 سنين وحصل ظروف
في الشغل واضطريت اقدم استقالتي ورجعت ابني وابتديت انا اهتم به لكن الولد كان
بيبكي وبيصرخ عايز يروح لجدته ودخل الشك جوا قلبي ان حماتي تكون عاملة سحر او
حاجة بسبب كلام جوزي الوحش عليها وكانت جدته دايمآ بتترجاني عشان اخليها
تشوف حفيدها لانه كان واحشها اوي ونفسها تشوفه كل فترة وخوفي زاد اكتر من
ناحيتها وحسيت بالقلق انها عايزة تكرر نفس اللي عملته مع ابنها في الماضي وفي
الاخر تسيبه .
المهم كانت في مرة نازلة من علي السلم سمعت حماتها بتدعي عليها وتقول يحرق قلبك
زي ما حرقتي قلبي وحرمتيني أشوف حفيدي ما اهتميت لكلامها وفي يوم جه جوزي
قالي احنا زودناها أوي خدي الولد ونزليه لأمي رديت عليه مش انت بردو اللي خلتني
أشيل في نفسي من أمك بسبب حكاياتك السيئة عنها وسكت وقتها .
نقلنا شقة جديدة وحسينا اننا ارتاحنا وحملت تاني في بنت وفرحت جدا بسبب حبي الشديد
للبنات في نفس التوقيت ده حماتي كانت أنهت خدمتها بالعمل وفي يوم الولادة كان يوم
صعب لان الولادة كانت عسيرة المهم ولدت وبعدين أصبت بجلطة وقعدت في المستشفي
شهر كامل والوحيدة اللي كانت تسأل عني وتجيب لي الأكل وتزورني كل يوم وتهتم بابني
وبنتي وأهلي وقتها مسافرين وتعبت مابين تعبي وزعلي علي أولادي ولما خرجت من
المستشفي لقيت اهمال من جوزي بيا وبالاولاد اتفأجات لقيته بيقولي ايه رأيك نروح نقعد
عن أمي وافقت وأنا منكسرة لان مافيش حل تاني .
بقلم /الكاتبة سيدة حسن
إرسال تعليق